kar ke azad har ik shahpar-e-bulbul katra
aaj sayyad ne ek aur naya gul katra
jeb-katron men hai mashhur saba-badi chor
subh ghunche ka jo kiisa ba-taammul katra
dekh tik apne gareban men munh daal ke shaikh
hirs ke haath se daman-e-tavakkul katra
panja-e-mehr bana shana-e-mashshata-e-subh
mah-jabin tu ne juun hi rishta-e-kakul katra
lenge murghan-e-chaman khak-e-gulistan ka sabaq
baghban jab ki khizan ne varaq-e-gul katra
kis qadar tez hai miqraz-e-sukhan teri ‘nasir’
gosh-e-hosh o khirad-e-talib-e-amul katra