kya karun ranj gavara na ḳhushi raas mujhe
jiine degi na miri shiddat-e-ehsas mujhe
is tarah bhi tiri duuri men kaTe hain kuchh din
hans paḌa huun to hua jurm ka ehsas mujhe
ham ne ik dusre ko pursa-e-furqat na diya
meri ḳhatir thi tujhe aur tira paas mujhe
ek Thahra hua dariya hai miri ankhon men
kin sarabon men Duboti hai tiri pyaas mujhe
jaise pahlu-e-tarab men koi nashtar rakh de
aaj tak yaad hai teri nigah-e-yas mujhe
reza reza hua jaata hai mira sang-e-vajud
yuun sada de na pas-e-parda-e-anfas mujhe
shaḳh se barg-e-chakida ka taqaza jaise
kuchh is tarah abhi tak hai tiri aas mujhe
ruuh ke dasht men ik ho ka saman hai ai ‘shaz’
de gaya kaun bhare shahr men ban-bas mujhe
Leave a Reply