Aahat Pe Kan Dar Pe Nazar Is Tarah Na Thi

aahat pe kaan dar pe nazar is tarah na thi

ek ek pal ki ham ko khabar is tarah na thi

tha dil men dard pahle bhi lekin na is qadar

viran to thi hayat magar is tarah na thi

har ek mod maqtal-e-arman-o-arzu

pahle to teri rahguzar is tarah na thi

jab tak saba ne chheda na tha nikhat-e-gulab

kucha-ba-kucha mahv-e-safar is tarah na thi

barson men pahle hoti thi nam astin kabhi

arzan mata-e-dida-e-tar is tarah na thi

Leave a Comment