iram ke nuur se tiira makan jala.e ga.e
charagh ham the kahan ke kahan jala.e ga.e
hamin ko us ne payambar kiya mashi.at ka
hamin se raz-e-mashi.at magar chhupa.e ga.e
kabhi to ham pe khulenge ḳhushi ke darvaze
isi umiid pe ham tere gham uTha.e ga.e
jo kal talak rahe aasi ḳhitab-e-mahfil men
vo log aaj tire naam se bula.e ga.e
ugal rahe the jo laava gham-e-ta.assub ka
hamare ḳhuun se vo atish-fishan bujha.e ga.e
rah-e-hayat men bhaḌki hai jab nifaq ki aag
magar is aag ka luqma hamin bana.e ga.e
rafu kiya kiye chak-e-vafa-o-tar-e-qaba
vo ruThte rahe aur ham unhen mana.e ga.e
Leave a Reply