mire badan men pighalta hua sa kuchh to hai
ik aur zaat men Dhalta hua sa kuchh to hai
miri sada na sahi haan mira lahu na sahi
ye mauj mauj uchhalta hua sa kuchh to hai
kahin na aḳhiri jhonka ho miTte rishton ka
ye darmiyan se nikalta hua sa kuchh to hai
nahin hai aankh ke sahra men ek buund sarab
magar ye rang badalta hua sa kuchh to hai
jo mere vaste kal zahr ban ke niklega
tire labon pe sambhalta hua sa kuchh to hai
ye aks paikar-e-sad-lams hai nahin na sahi
kisi ḳhayal men Dhalta hua sa kuchh to hai
badan ko toḌ ke bahar nikalna chahta hai
ye kuchh to hai ye machalta hua sa kuchh to hai
kisi ke vaste hoga payam ya koi qahr
hamare sar se ye Talta hua sa kuchh to hai
ye main nahin na sahi apne sard bistar par
ye karvaTen si badalta hua sa kuchh to hai
vo kuchh to tha main sahara jise samajhta tha
ye mere saath phisalta hua sa kuchh to hai
bikhar raha hai faza men ye duud raushni ka
udhar pahaḌ ke jalta hua sa kuchh to hai
mire vajud se jo kaT raha hai gam-ba-gam
ye apni raah badalta hua sa kuchh to hai
jo chaTta chala jaata hai mujh ko ai ‘bani’
ye astin men palta hua sa kuchh to hai
Leave a Reply