Manzar Bhopali
vatan-nasib kahan apni qismaten hongi
jahan bhi ja.enge ham saath hijraten hongi
kabhi to sahib-e-divar-o-dar banenge ham
kabhi to sar pe hamare na.i chhaten hongi
ye ashk tere mire ra.egan na ja.enge
unhin charaghon se raushan mohabbaten hongi
tiri ada men hai inkar bhi ijazat bhi
jo ham milenge to duuri na qurbaten hongi
amal durust karen apne rahnuma.e-kiram
kahunga saaf to sab ko shikayaten hongi
ham un ke samne sach bolne ke mujrim hain
hamin pe vaqt ki saari inayaten hongi
hamen to apne masa.il ka hal bhi hai darkar
tumhare paas to ḳhali basharaten hongi
vahan pe qafile bhaTkenge tai hai ye ‘manzar’
jahan usuul se ḳhali qayadaten hongi
abhi to qaid hain jazbon ki andhiyan dil men
hamara sabr jo toḌa qayamaten hongi
Leave a Reply