ashna koi ba-vafa na mila
kashti-e-dil ka nakhuda na mila
ja-e-marham namak chhidakna tha
zakhm khane ka kuchh maza na mila
us ke kuche men aise bhule ham
ghar ke jaane ka rasta na mila
dil diya jis ko ranj hai paaya
koi dildar ba-vafa na mila
zindagi talkh ho gai apni
tujh se milne ka kuchh maza na mila
dekh li ham ne dosti teri
ham se ab aankh bevafa na mila
kuchh ijara nahin bane na bane
kya shikayat hai dil mila na mila
asman par dimagh-e-yar raha
kabhi jhuk kar vo mah-laqa na mila
bosa-e-lab ki tum se kya ummid
ek biida bhi paan ka na mila
dhundhti hain kunisht men ja kar
shaikh kaabe men to khuda na mila
ek ik ko pilae do do jaam
dard bhi ham ko saqiya na mila
naqal kab asl ki muqabil hai
us ke chehre se aa bana na mila
nazar aai jo vo dahan to kahun
mujh ko anqa ka ashiyana mila
jin ko takiya tha apni masnad par
un ko dekha ki boriya na mila
‘bahr’ nikle the dhundhne us ko
aise khoe gae pata na mila
Leave a Reply