main ye nahin kahti ki mujhe yaad kiya kar
chup-chap barasti hui barish ko suna kar
dastak mire darvaze pe mat aise diya kar
sau baar kaha hai ki hava dhire chala kar
kahta hai ye a.ina mujhe nazren chura kar
nam-dida mujhe dekh ke mat aise hansa kar
ho jaa.e na kuchh aur udasi men izafa
tu ḳhud se miri maan zara kam hi mila kar
sargoshi na kar aise hava kaan men mere
tu lahje men us ke na mira naam liya kar
jaari ho mire siine men sanson ka tasalsul
rakh haath mire Thahre hue qalb pe aa kar
phir dil men tire naam ki paḌti hain dhamalen
hoti hai miri ruuh bhi ḳhush ḳhaak uḌa kar
ghunghaT kabhi chehre se uThate hi nahin ho
milte ho kahin saare hijabat uTha kar
karta hai vo phir raqs sar-e-bazm musalsal
rakh dete ho zi-hosh ko divana bana kar
suraj ko bujha dete ho tum shaam se pahle
aur dil se ye kahte ho ki din-rat jala kar
lagta hai kabhi duur bahut duur ho mujh se
lagta hai ki chhu lungi kabhi haath baḌha kar
main chadar-e-tathir ka deti huun vasila
rakh lena mire aibon ko duniya se chhupa kar
auqat bhi miTTi hai tiri zaat bhi miTTi
tu ḳhaak hai mat ḳhaak pe itra ke chala kar
aa.ega bhala kaun tire pichhe ai pagal
mat rahon men ‘jina’ tu ThiThak kar yuun ruka kar
Leave a Reply