Ehsan Danish
vafa ka ahd tha dil ko sambhalne ke liye
vo hans paḌe mujhe mushkil men Dalne ke liye
bandha hua hai baharon ka ab vahin tanta
jahan ruka tha main kanTe nikalne ke liye
koi nasim ka naghma koi shamim ka raag
faza ko amn ke qalib men Dhalne ke liye
ḳhuda na karda zamin paanv se agar khiski
baḌhenge tund bagule sambhalne ke liye
utar paḌe hain kidhar se ye andhiyon ke julus
samundaron se jazire nikalne ke liye
tire saliqa-e-tartib-e-nau ka kya kahna
hamin the qarya-e-dil se nikalne ke liye
kabhi hamari zarurat paḌegi duniya ko
dilon ki barf ko sho.alon men Dhalne ke liye
ye sho.abde hi sahi kuchh fusun-garon ko bulao
na.i faza men sitare uchhalne ke liye
hai sirf ham ko tire ḳhal-o-ḳhad ka andaza
ye aa.ine tu hain hairat men Dalne ke liye
na jaane kitni masafat se aa.ega suraj
nigar-e-shab ka janaza nikalne ke liye
main pesh-rau huun isi ḳhaak se ugenge charagh
nigah-o-dil ke ufuq ko ujalne ke liye
fasil-e-shab se koi haath baḌhne vaala hai
faza ki jeb se suraj nikalne ke liye
kun.en men phenk ke pachhta raha huun ai ‘danish’
kamand thi jo minaron par Dalne ke liye
Leave a Reply