Sunil Kumar Jashn
hai rakhni kitni ravani nahin samajh paa.e
javan log javani nahin samajh paa.e
vo log ishq ke sahra men tishna-lab hi rahe
jo log ret ko paani nahin samajh paa.e
ulaT-palaT ke bahut ziist ko paḌha ham ne
kisi tarah bhi ma.ani nahin samajh paa.e
jadid lahje men us ne hamari baat kahi
samajh thi jin ki purani nahin samajh paa.e
hujum-e-shahr men din jaise-taise kaaT diya
kahan hai raat bitani nahin samajh paa.e
tamam umr suḳhan-ashna rahe lekin
ghazal thi kis ko sunani nahin samajh paa.e
ye ham ne Thaan rakhi hai ki ḳhush nahin rahna
magar ye kis liye Thani nahin samajh paa.e
ham us ko ḳhvab samajhte the sub.h ka rangin
ham us ko raat ki raani nahin samajh paa.e
ye log apni ḳhirad ke shikar log hain ‘jashn’
tabhi to dil ki zabani nahin samajh paa.e
Leave a Reply