Mubashshir Saeed
sajda-e-yad men sar apna jhukaya hua hai
ham ne ushshaq ke rutbe ko baḌhaya hua hai
tohmaten hon ya ki patthar hon muqaddar us ka
ek divana tire shahr men aaya hua hai
mera maqsad tha faqat ḳhaak uḌana sahab
is liye dasht ko ghar-bar banaya hua hai
shaukat-e-majlis-e-hijran ko baḌhana tha so yaar
main ne palkon pe tira hijr sajaya hua hai
ik pari-zad hai dhaḌkan ke ilaqe men muqim
jis ne mahaul ko pur-vajd banaya hua hai
paanv men Daal ke tujh naam ke ghungru ham ne
apne andar hi miyan raqs rachaya hua hai
yaar ki sohbat-e-pur-faiz ki barkat ne ‘sa.id’
is zamane men mira kaam chalaya hua hai
Leave a Reply