Bedam Shah Warsi

Dil Liya Jaan Li Nahin Jati

dil liya jaan li nahin jaati

aap ki dil-lagi nahin jaati

sab ne ghurbat men mujh ko chhod diya

ik miri be-kasi nahin jaati

kaise kah duun ki ghair se miliye

an-kahi to kahi nahin jaati

khud kahani firaq ki chhedi

khud kaha bas suni nahin jaati

khushk dikhlati hai zaban talvar

kyuun mira khuun pi nahin jaati

lakhon arman dene valon se

ek taskin di nahin jaati

jaan jaati hai meri jaane do

baat to aap ki nahin jaati

tum kahoge jo rouun furqat men

ki musibat sahi nahin jaati

us ke hote khudi se paak huun main

khuub hai be-khudi nahin jaati

pi thi ‘bedam’ azal men kaisi sharab

aaj tak be-khudi nahin jaati

More Poems

Leave a Comment