chhat pe badli jhuki si rahti hai
kab se barish thami si rahti hai
koi shab dhuup ki si kaifiyyat
koi din chandni si rahti hai
ek hasti miri anasir chaar
har taraf se ghiri si rahti hai
kaise ji-bhar ke dekhiye us ko
dekhne men kami si rahti hai
koi ik za.iqa nahin milta
gham men shamil ḳhushi si rahti hai
jab se maa.il hue hain mere qadam
raah mujh se khinchi si rahti hai
ik na ik shaghl chahiye us ko
mujh men divangi si rahti hai
tiir andhere men jab chalata huun
dhyan men raushni si rahti hai
shaḳh-e-ummid ko ḳhizan na bahar
ye sab din hari si rahti hai
ek ḳhitte ke bojh se raahi
saari duniya dabi si rahti hai
Leave a Reply