Jameeluddin Aali
tere ḳhayal ke divar-o-dar banate hain
ham apne ghar men bhi tera hi ghar banate hain
baja.e yaum-e-malamat rakha hai jashn mira
mire bhi dost mujhe kis qadar banate hain
bikherte raho sahra men biij ulfat ke
ki biij hi to ubhar kar shajar banate hain
bas ab hikayat-e-mazduri-e-vafa na bana
vo ghar unhen nahin milte jo ghar banate hain
tira bhi naam chhapa vaj.h-e-marg-e-ashiq men
ye dekh be-ḳhabare yuun ḳhabar banate hain
vo kya ḳhuda ki parastish karenge meri tarah
jo ek but bhi bahut soch kar banate hain
kaha ye kis ne ki hai qasr-e-ishq rahn-e-shabab
banane vaale ise umr-bhar banate hain
tu aa.e to tiri kari-gari ki laaj rahe
ham aaj dasht men rah kar bhi ghar banate hain
mili na fursat-e-ara.ish-e-bayaban bhi
ki ham yahan bhi tire bam-o-dar banate hain
adu havao karachi ke log haare nahin
jo ghar girao vo bar-e-digar banate hain
abu-dhabi men hamesha na.i ghazal ‘ali’
ye log hi to tujhe mo’tabar banate hain
Leave a Reply