gham ki tahzib aziyyat ka qarina sikhen
aao is shahr men jiina hai to jiina sikhen
maut aane ki sada lamha-ba-lamha chahen
ziist karne ka hunar zina-ba-zina sikhen
har nahin haan se baḌi hai ye haqiqat samjhen
haan bahut siikh chuke ab to koi na sikhen
jhank kar ankhon men siine men utar kar dekhen
naqsha-e-dil se koi raz-e-dafina sikhen
shahr-e-kotah men sab past-nashin past-nishan
kis ko hamraz karen kis ka qarina sikhen
falsafa ishq ka asrar fan-o-hikmat ke
ḳhanqahon se paḌhen sina-ba-sina sikhen
dil to a.ina hai shaffaf rakhen ai ‘shahid’
kyuun karen bughz-o-hasad kis liye kiina sikhen
Leave a Reply