Sarfraz Nawaz
ye main ne maana ki pahra hai saḳht raton ka
yahin se niklega phir qafila charaghon ka
yuun ḳhushbuon men Dubo.e hue rakhun kab tak
gunah kyuun na main kar luun qubul hathon ka
charagh-pa hai miri niind in dinon mujh se
main koi shahr basane laga tha ḳhvabon ka
hiran si chaukḌi bharne lagegi har dhaḌkan
jo zikr chheḌ duun us ki ghazal ankhon ka
ḳhumar o kaif-o-surur-o-nashat ka aalam
main qarz-dar bahut huun tumhari bahon ka
ai din tu raushni de kar ke is ke badle men
hisab maang na mujh se siyah raton ka
badan-sara.e men Thahra hua musafir huun
chuka raha huun kiraya main chand sanson ka
Leave a Reply