Poet
hove mash.hur na kyon ashiq-e-badnam bura
ishq kahte hain jise hai ye bahut kaam bura
dekhen anjam ho kya us ka ḳhuda ḳhair kare
dam-e-ulfat men phansa hai dil-e-nakam bura
tu bhi ashiq ho kisi par to khule haal tujhe
dil laga hota hai sun o but-e-ḳhud-kam bura
nang-o-ar un ko na ho milne se mere kyuun kar
sach hai kambaḳht is ulfat hi ka hai naam bura
‘aish’ aghaz-e-mohabbat hi men tha dil ko kaha
dekh hota hai bure kaam ka anjam bura
Leave a Reply