naam mera hai gul-badshah
umr meri hai terah baras
aur kahani
meri umar ki tarah se muntashir muntashir
mukhtasar mukhtasar
meri be-nam be-chehra maan
be-dava mar gai
baap ne us ko burqe men dafna diya
us ko dar tha ki munkir-nakir
meri amman ka chehra na dekhen
vaise zinda thii, jab bhi vo madfun thi
baap ka naam zar-taj-gul
umar battis baras
vo mujahid shahadat ka talib rah-e-haq ka musafir hua
aur jam-e-shahadat bhi us ne
apne bhaai ke hathon piya
jo shumali mujahid tha
aur panj-vaqta namazi bhi tha
masala is shahadat ka pechida hai
is ko behtar yahi hai yahin chhod den
ab bahar-hal baaba to jannat men hai
us ke hathon men jam-e-tuhur
us ki banhon men huur o qusur
meri taqdir men bam-dhamake dhuan
pighalti hui ye zamin
bikharta hua asman
bad-az-marg vo zinda hai
zindagi mujh se sharminda hai
2
kal sar-e-sham dushman ne aate hue
bam ke hamrah barsa diye
mujh pe kuchh piile thaile
jin se mujh ko mile
gol roti ke tukde
ek makkhan ki tikiya
ek sharbat ki botal
murabbe ka dabba
is ke badle men vo le gae
mere bhaai ka dast-e-mashaqqat
jis men minnat ka dora bandha tha
meri chhoti bahan ka vo paanv
jis se rang-e-hina phutta tha
log kahte hain ye amn ki jang hai
amn ki jang men hamla-avar
sirf bachchon ko be-dast-o-pa chhodte hain
un ko bhuka nahin chhodte
akhir insaniyat bhi koi chiiz hai
main dahakte pahadon men tanha
apne tarke ki banduq thame khada huun
tamasha-e-ahl-e-karam dekhta tha
tamasha-e-ahl-e-karam dekhta huun