shola-e-shauq ki aghosh men kyunkar aa.uun
ik tamanna huun ki miT ja.un agar bar aa.uun
ek davat huun agar un ke labon par khelun
ek hasrat huun agar ḳhud ko mayassar aa.uun
har taraf se mujhe kya ghuur rahi hain ankhen
ḳhvab huun dida-e-bedar men kyunkar aa.uun
ek aalam huun jise bas koi mahsus kare
koi ma.ani huun ki alfaz ke andar aa.uun
naqsh-bar-ab sahi kuchh bhi sahi huun to sahi
ret ki qaid men kya ḳhud se bichhaḌ kar aa.uun
meri pahchan ho shayad inhin zarron ki chamak
apne ghar men isi ziine se utar kar aa.uun
meri ayat pe iman na laane vaalo
taab laoge agar jild se bahar aa.uun
phunk Dalin mire sho.ale ne faza.en saari
isi dhun men ki nazar apne barabar aa.uun
le chuka ab-e-baqa tujh se ab ai bahr-e-arab
uḌ ke jaata huun ki ye qarz ada kar aa.uun
apne daman men kaho aag sambhalun kyunkar
haath apne to ‘muhib’ ḳhair se aksar aa.uun
Leave a Reply