Numaish Mein

Asrarul Haq Majaz

vo kuchh doshizgan-e-naz-parvar

khadi hain ik bisati ki dukan par

nazar ke samne hai ek mahshar

aur ik mahshar hai mere dil ke andar

sunahra kaam rangin sa.riyon par

bisat-e-asman par mah-o-akhtar

jamal-o-husn ke pur-roab tevar

numayan chand si peshaniyon par

vo rukhsaron pe halki halki surkhi

labon men pur-fishan ruh-e-gul-e-tar

siyah zulfon men ruh-e-sumbulistan

nazar sar-chashma-e-tasnim-o-kausar

ada-e-naz gharq-e-kaif-e-sahba

siyah mizhgan sharab-aluda nashtar

chamak taron ki chashm-e-surmagin men

jhalak chandi ki jism-e-marmarin men

vo khushbu aa rahi hai pairahan se

faza hai duur tak jis se moattar

tabassum aur hansi ke narm tufan

fazaon men musalsal barish-e-zar

nishat-e-rang-o-bu se chuur ankhen

sharab-e-nab se labrez saghar

vo mehraben si sinon par numayan

faza-e-nur men cupid ke shah-par

nafas ke amad-o-shud se talatum

shab-e-mahtab men jaise samundar

sitaron ki nigahen jhuk gai hain

zamin phir khanda-zan hai asman par

koi aina-dar-e-husn-e-faras

kisi men husn-e-yunani ke jauhar

kisi men aks-e-”maasum-e-kalisa”

kisi men partav-e-asnam-e-azar

ye shirin hai vo naushaba hai shayad

nahin yaan farq-e-farhad-o-sikandar

ye apne husn men azra-e-vamiq

vo apne naaz men salma-e-‘akhtar’

ye tabani men khurshid-e-darakhshan

vo raanai men us se bhi fuzun-tar

hansi us ki tulu-e-subh-e-khandan

nava us ki surud-ए-kaif-avar

ye shola-afrin vo barq-afgan

ye aina-jabin vo mah-paikar

vo jumbish si hui kuchh anchalon ko

vo lahren si uthin kuchh sa.riyon par

khiram-e-naz se naghme jagati

vo chal diin ek janib muskura kar

kisi ki hasraten pamal karti

kisi ki hasraten ham-rah le kar

kabhi ankhen dukanon par jami hain

kabhi khud apni hi barnaiyon par

idhar ham ne ik ah-e-sard khinchi

hansi phir aa gai apne kiye par