Qarar Kho Ke Chale Be-Qarar Ho Ke Chale

Charkh Chinioti

qarar kho ke chale be-qarar ho ke chale

ada ada pe tiri ham nisar ho ke chale

rah-e-vafa men raqabat ke moḌ bhi hain bahut

ye dil se kah do zara hoshiyar ho ke chale

kisi ke kahne pe tufan men Daal di kashti

ḳhuda kare ki hava sazgar ho ke chale

hamen to naaz hai apne hasin gunahon par

vo log aur the jo sharmsar ho ke chale

tumhari ambarin zulfon ko chhu ke aa.i hai

hava ki mauj na kyuun mushk-bar ho ke chale

vo jite-ji to na aa.e mizaj-pursi ko

janaza dekha to saath ashk-bar ho ke chale

nazar ne mil ke nazar se mila diya ham ko

ye rabt-e-bahami ab ustuvar ho ke chale

vo arz-e-vasl pe ḳhamosh ho ke baiTh ga.e

na aar ho ke chale vo na paar ho ke chale

azal se ‘charḳh’-e-tabi.at shagufta hai apni

jo milne aa.e vo bagh-o-bahar ho ke chale