gard-e-majnun le ke shayad bad-e-sahra jaa.e hai
jaane kis vahshat men basti ko bagula jaa.e hai
main na kahta tha ki lazim hai nigah bhar fasla
jab bahut nazdik ho to aks dhundla jaa.e hai
kya karun ai tishnagi tera mudava bas vo lab
jin labon ko chhu ke paani aag banta jaa.e hai
ḳhauf ka mafhum pahli baar samjha ishq men
baat hoti kuchh nahin aur jaan ko aa jaa.e hai
le jahan ko taj diya le khinch Daali apni khaal
ab usi me.aar par ashiq ko parkha jaa.e hai
Leave a Reply