Tripurari
purani choT main kaise dikha.un
uThe jab dard to phir muskura.un
bahut se log mujh men ro rahe hain
amaan kis kis ko yaan par chup kara.un
tumhari yaad jo ab mar chuki hai
main us dafan kar duun ya jala.un
bahut ji chahta hai kuchh dinon se
main apne-ap se hi ruuTh ja.un
miri ḳhatir dua karna mire dost
kisi din ḳhud ko sach men bhuul ja.un
guzarish hai na mujh ko yaad aa.e
tamanna hai na tujh ko yaad aa.uun
tumhara naam phir sahil pe likkhun
lahr se aane pahle ḳhud miTa.un
bana.unga main ḳhud ko ji kiya to
faqat bigḌi hui main kyuun bana.un
main bhitar se bahut TuuTa hua huun
kisi se haal apna kya chhupa.un
Leave a Reply