Poet
aag ko phuul kahe jaa.en ḳhirad-mand apne
aur ankhon pe rakhen diid ke dar band apne
laakh chaha ki gham-o-fikr-e-jahan se chhuTen
jama-e-dil pe ye sajte rahe paivand apne
shahr men dhuum machati rahi kya taaza hava
ham ne dar va na kiya ham hain gila-mand apne
sat.h-e-qirtas pe utre na tiri gul-badani
kitne aajiz hue jaate hain hunar-mand apne
marhala tai na hua ahl-e-tazabzub se koi
jurm-e-tashkik se baiThe rahe paband apne
aisa kuchh gardish-e-dauran ne rakha hai masruf
majare ho na sake ham se qalam-band apne
ham to mar jaate gham-e-hijr ke hathon ‘shahid’
dasht afaq men hote na agar chand apne
Leave a Reply