Kausar Niyazi
ḳhuda nasib kare jis ko sohbaten meri
na bhuul paa.e kabhi vo hikayaten meri
kahan ga.e miri masruf sa.aton ke rafiq
sada.en deti hain ab un ko fursaten meri
tamam shahr gurezan hai aaj kal jaise
kisi ke naam na lag jaa.en tohmaten meri
ḳhuda ka shukr ki main ḳhud-shanas huun varna
samajhta kaun pur-asrar adaten meri
main apni zaat ke sahra men kho gaya ‘kausar’
miri nazar se bhi ojhal hain vus.aten meri
Leave a Reply