Kyunkar Na Khaksar Rahen Ahl-E-Kin Se Dur

kyunkar na khaksar rahen ahl-e-kin se duur

dekho zamin falak se falak hai zamin se duur

parvana vasl-e-shama pe deta hai apni jaan

kyunkar rahe dil us ke rukh-e-atishin se duur

mazmun-e-vasl-o-hijr jo naame men hai raqam

hai harf bhi kahin se mile aur kahin se duur

go tir-e-be-guman hai mire paas par abhi

jaae nikal ke sina-e-charkh-e-barin se duur

vo kaun hai ki jaate nahin aap jis ke paas

lekin hamesha bhagte ho tum hamin se duur

hairan huun ki us ke muqabil ho aina

jo pur-ghurur khinchta hai mah-e-mubin se duur

yaan tak adu ka paas hai un ko ki bazm men

vo baithte bhi hain to mire ham-nashin se duur

manzur ho jo diid tujhe dil ki aankh se

pahunche tiri nazar nigah-e-dur-bin se duur

duniya-e-dun ki de na mohabbat khuda ‘zafar’

insan ko phenk de hai ye iman o diin se duur

Leave a Comment