Poet
a.enge vo to aap men hargiz na a.enge
ham apni be-ḳhudi ke tamashe dikha.enge
ham naqd-e-dil jo siine men apne na pa.enge
duzd-e-nigah-e-yar ko chori laga.enge
ai be-ḳhudi jo aap men ham ab ki a.enge
phir dil-lagi se bhi nahin dil ko laga.enge
jab su-e-dasht aap ke divane ja.enge
farhad-o-qais duur talak lene a.enge
parvana vo kahenge to ham un ko sho.ala-ru
ham bhi jala.enge jo vo ham ko jala.enge
kyuun dabte hain honTh vo danton men baar baar
kya tegh-e-lab ko ab-e-guhar men bujha.enge
dam-e-bala se dekhiye kyunkar najat ho
kab tak vo ham ko zulf ki galiyan jhaka.enge
vahshi-e-chashm-e-yar jo niklega shahr se
ankhon ko Dhele ahu-e-sahra laga.enge
huron se chal ke dad-e-jamal us ki lenge ham
tasvir-e-yar qasr-e-jinan men laga.enge
uTThenge phir na baiTh ke manind-e-naqsh-e-pa
ham apne zo.af ki tumhen taqat dikha.enge
jaage hue firaq ke sote hain zer-e-ḳhak
bad-ḳhvab hon ke ham jo farishte jaga.enge
lene men jins-e-dil ke to ujlat kamal hai
dene men naqd-e-vasl ke barson jhaka.enge
garm-e-ḳhiram honge agar sehn-e-bagh men
angaron par vo kabk-e-chaman ko luTa.enge
sina-sipar hain ashiq-e-jan-baz saikaḌon
tegh-e-nigah-e-naz vo kab azma.enge
ab ki to hijr-e-yar men ham gor jhank aa.e
jiite hain to kisi se na phir dil laga.enge
ai shahsavar-e-naz ye miTta hai baar baar
tere samand-e-husn ko ham ḳhud bana.enge
ham kyuun ita.at in ki karen fa.eda ‘qalaq’
kya ye butan-e-dahr ḳhuda se mila.enge
Leave a Reply