ik ahd ki surat hai ki paiman ki surat
tu dil men basa rahta hai iman ki surat
likhti huun har ik baat guzarti hai jo dil pe
ban ja.egi ik roz ye divan ki surat
TuuTa hai abhi tak na hi TuTega kabhi bhi
rakhti huun tujhe saath main ik maan ki surat
ab ban ke yaqin dil men simaT aaya hai mere
aghaz men lagta tha jo imkan ki surat
aao to zara baagh men mil kar unhen dekhen
aa.e hain parinde yahan mehman ki surat
ai charagaro aao mere samne aao
dekho to zara be-sar-o-saman ki surat
Leave a Reply