Rawan-Dawan Nai Tahzib Ka Safar Rakkho

ravan-davan nai tahzib ka safar rakkho

magar nigah ko manzil se ba-khabar rakkho

sadaqaton ki hifazat ka hausla ho agar

to apne hathon se neze pe apna sar rakkho

tumhari nasl ki parvaz men khalal na pade

mat un ke samne apne shikasta par rakkho

na gham karo jo kadi dhuup ka safar hai hayat

jilau men apne koi saya-e-shajar rakkho

sahar ke bhule sar-e-sham laut aenge

laven badha ke charaghon ki baam par rakkho

jo sach likhogi to phir kuchh na likh sakogi ‘nasim’

qalam men maani badalne ka bhi hunar rakkho

Leave a Comment