Haar-Singar

Azra Naqvi

tum ne dekhe hain kabhi har-singar

vo dil-avez se maasum se do-range phuul

raat ko shakh pe khilte the sitaron ki tarah

vo bhala din ki tamazat ke sitam kyuun sahte

is liye akhir-e-shab apne hi husn se be-khud ho kar

os se bhige hue farsh pe kis pyaar se bichh jaate the

jaise kal raat yahan

zaafaran rang ki chadar pe bikhere hon kisi ne moti

aur har roz savere koi bachchi aa kar

farsh-e-gul par bahut ahista se chalti thi

khayalon men pahunch jaati thi

is paristan men ki jis ki pariyan

raat ko farsh pe ye phuul bichha jaati thiin

yaad galiyon se guzarti huun to bachpan ke kisi mod pe mil jaate hai

vahi maasum, dil-avez, subuk har-singar

janti huun main vahan

ab mire sahn ki divar ke us paar nahin koi darakht

ab vahan ek imarat hai bahut unchi si