Nilofar Noor
pahle to chaak zaḳhm-e-jigar dekhte rahe
phir dekhne valon ki nazar dekhte rahe
tham ne kahan diya tha hamen ḳhvahishat ne
ruk ruk ke bazuon ka hunar dekhte rahe
lab par khile hue the tabassum ke phuul par
jo ḳhak-nazar the vo sharar dekhte rahe
tum ne to zindagi ka safar ḳhatm kar diya
ham the ki teri rahguzar dekhte rahe
pahle to ham ne dard ke paude laga.e ḳhud
phir ansuon ke barg-o-samar dekhte rahe
avaz de rahi thi na.i zindagi hamen
ham log magar raḳht-e-safar dekhte rahe
Leave a Reply