Dil Pe Thi Sabt Jo Tahrir miTai Na Gai

Nasir Shahzad

dil pe thi sabt jo tahrir miTa.i na ga.i

kis ki tasvir thi tasvir bhula.i na ga.i

aa ke us ban men mile phir na kabhi do premi

ghaas pagDanDiyon se jhiil se kaa.i na ga.i

pyaar ki aanch se jal uTTha kanval-kant badan

us se surat miri nainon men chhupa.i na ga.i

mujh men rach bas ke bhi tu mujh se alag ḳhud se alag

tere jivan ki amiT-rup ikaa.i na ga.i

TuuTe katbon ke siva mil na saka kuchh bhi magar

is miTe shahr ke Tilon ki khuda.i na ga.i

raat bhar jal pe girin jalte sitaron ki laven

mujh se chadar koi naddi pe bicha.i na ga.i

is ke darshan se mili mujh ko ḳhud apni pahchan

shakl ik ruuh talak surat-e-a.ina ga.i