Poet
dil ko har haal men masruf-e-dua rakkha hai
main ne ye jurm bhi apne pe rava rakkha hai
meri har saans rasulon ki zaban hai jaise
main ne har saans men ik harf-e-vafa rakkha hai
aap to garmi-e-halat se ghabrate hain
ham ne suraj ko bhi siine men chhupa rakkha hai
agahi garm-e-safar hai na.i manzil ki taraf
chand ka zikr hi kya chand men kya rakkha hai
ham ki halat ki tasvir batane vaale
ham ko halat ne tasvir bana rakkha hai
zindagi se kaho ab koi taqaza na kare
main ne har gham ko kaleje se laga rakkha hai
jis jagah qafila-e-dard ruka tha ‘ḳhusrav’
dard-mandon ne vahin shahr basa rakkha hai
Leave a Reply