jab juda peḌon se kaT kar Daali Daali ho ga.i
ik tere jangal ki majid god ḳhali ho ga.i
koi mausam ho ba-har-surat hava chalti rahi
baḌh gaya itna dhuan har shakl kaali ho ga.i
mere chehre par likhi thiin surḳhiyan aḳhbar ki
jo bhi surat samne aa.i savali ho ga.i
hain vahi alfaz lekin vo ma.ani hi nahin
baat sulh-o-ashti ki aaj gaali ho ga.i
teri tasviron pe bhi apna nahin hai iḳhtiyar
fasla itna baḌha surat ḳhayali ho ga.i
ḳhuun ka ḳhatt-e-istava ‘majid’ ta.assub men ghira
pyaar ki bad-e-saba bad-e-shumali ho ga.i
Leave a Reply