Poet
but-e-ghuncha-dahan pe nisar huun main nahin jhuut kuchh is men khuda ki qasam
mira tair-e-dil isi qaid men hai mujhe zulf ke dam-e-bala ki qasam
nahin bhata mujhe koi rashk-e-pari koi laakh hasin ho bala se miri
mira dil tira ashiq-e-shefta hai mujhe tere hi naz-o-ada ki qasam
mire dil ko zara nahin tab-o-taab ki uthaun tumhara ye qahr-o-ghazab
mire qatl men der na chahiye ab tumhen apne hi jaur-o-jafa ki qasam
na to huur hi ko ye mila hai namak na pari hi ke rukh men hai aisi chamak
tire samne phike hain shams-o-qamar mujhe tire hi rukh ki ziya ki qasam
mujhe itr-e-hina ki nahin hai hava mujhe phulon se hota hai dagh-e-siva
kabhi nikhat-e-zulf sungha de saba tujhe nafa-e-mushk-e-khata ki qasam
mire baad sahega na koi bhi gham na uthega kisi se ye ranj-o-alam
karo tark tum aaj se zulm-o-sitam tumhen apni hi mehr-o-vafa ki qasam
kabhi dard se rota ho ‘agha’ agar to hansi se ye kahta hai vo gul-e-tar
mira maan kaha are naala na kar tujhe bulbul-e-naghma-sara ki qasam
Leave a Reply