poet

Kyunkar Na Khush Ho Sar Mera Latakka Ke Dar Mein

kyunkar na khush ho sar mira latakka ke daar men

kya phal laga hai nakhl-e-tamanna-e-yar men

chaha bahut vali na mua hijr-e-yar men

mahbub kya ajal bhi nahin ikhtiyar men

mubaf surkh kyuun na ho gesu-e-yar men

shab-khun yaani laate hain shubha-e-tar men

mubaf hai kinare ka zulf-e-nigar men

ya barf kaundti hai ye abr-e-bahar men

rahat ke saath ranj bhi hai rozgar men

hansne pe gul ke roti hai shabnam bahar men

pinhan hua hai khal-e-khat-e-mushk-bar men

milta nahin hai DhunDhe se naafa tatar men

mar jaunga khayal-e-rukh-o-zulf yaar men

aa jaegi ajal isi lail-o-nahar men

lipti hai choti yaar ki phulon ke haar men

sumbul ne gul khilae hain fasl-e-bahar men

aauun na aap men jo vo aae kanar men

rakhkhun main apni tarah use intizar men

sabza tak apni qabar ka khvabida ho gaya

par ham ko niind aai na ik dam mazar men

o barq-e-tur ta-ba-kuja lan-taraniyan

pathra gaiin hain ankhen mire intizar men

jaaen kab ashna tiri dariya ki sair ko

ashk-e-ravan se rakhti hain dariya kanar men

ye kis ne aa ke qabar pe bechain kar diya

kya so rahi thi chain se kunj-e-mazar men

aaya hai khvab bhi shab-e-vaada agar hamen

ankhen khuli rahi hain tire intizar men

khak-e-chaman se kya hai mira kalbad bana

daghon se gul jo khilte hain fasl-e-bahar men

baad az fana bhi husn-parasti se kaam hai

aina saan safai hai sang-e-mazar men

aansu bahaun ankhon se us ko laga ke main

moti piroun yaar ki phulon ke haar men

kyuun munh se bolta nahin nikla hai ab to khat

darvaza band baagh ka mat kar bahar men

rote hain yaad gauhar-e-dandan men un din

moti bhare hain misl-e-sadaf yaan kanar men

kahiye vo laal-e-lab khat-e-mushkin men dekh kar

paida hua hai laal-e-badakhshan tatar men

farhad ki ye ankhen hain shirin ko DhunDhte

ab dil ghazal phirti nahin kohsar men

muuzi hai charkh is se nahin kaj-ravi baiid

sach yuun hai rasti nahin raftar men

tujh bin nahin ye jalva-numa shab ko mahtab

chashm-e-falak safed hue intizar men

to sun ke saath daudun jo main mana karun

zalim anan-e-sabr nahin ikhtiyar men

phulon ka haar ban gaya hai motiyon ka haar

aisa khushi se phuul gaya dast-e-yar men

nafrat ye in gulon ko hai marne ke baad bhi

hota nahin hai gul mire sham-e-mazar men

gesu ko us ki kuchh nahin parva-e-naqd-e-dil

ye maal vo hai jo hai sab chashm-e-yar men

deti hai na-tavani agar rukhsat-e-chaman

phansta huun dam-e-mauj-e-nasim-e-bahar men

karta hai koi turk-dila neza-baziyan

dumbala surme ka ye nahin chashm-e-yar men

pisega ustukhan asar-e-iztirab-e-dil

aalam ab asiya ka hai sang-e-mazar men

bagh-e-jahan men aish ke fursat bahut hai kam

labrez jam-e-umr hai gul ka bahar men

kis mah-vash se raat ham-aghosh ham hue

aalam hilal ka hai hamare kanar men

masl-e-hina hai ghair ki hathon mire bahar

sarsabz agarche hon chaman-e-rozgar men

aata hai jab vo tan men mire jaan aati hai

jaane men misl-e-umr nahin ikhtiyar men

allah re safai-e-rukh-e-yar dekhna

hairan hai aina kaf-e-aina-dar men

apne gale ke haar ke gar vo chadhae phuul

phula na phir samaun main kunj-e-mazar men

gar peshva-e-khalq hai zahid to kya hua

tasbih ka imaam nahin hai shumar men

mazmun tiri kamar ka hai kya aaj banda gaya

anqa phansa hai un ki dam-e-shikar men

jhadti hain munh se phuul jo karta hai baat tu

tujh sa nahin hai gul chaman-e-rozgar men

qasid to saaf kah di mukaddar hai mujh se kya

likha jo naama yaar ne khat-e-ghubar men

talvar le jo haath men ban jaae shakh-e-gul

sausan ka phuul hue sipar dast-e-yar men

ye kis ne aa ke qabr ko raunda hai paaon se

aati hai bu-e-gul miri khak-e-mazar men

baad az fana bhi khvahish-e-didar-e-yar hai

rauzan koi zarur hai mere mazar men

jab raat hoti hai to sitare nikalte hain

afshan zarur chahiye the zulf-e-yar men

kis ko ye hosh hai jo kare chaak jeb ko

bahar hon apne jaame se fasl-e-bahar men

farmaish apni dekhne valon pe karti hain

ankhon ke Dore hon mire phulon ke haar men

paanv se apne aaegi sahra men bhi bahar

chhale hamare phuul piroenge khaar men

vajib hai ab-e-tegh se kar lijiye vazu

sajda jo kijiye kham-e-abru-e-yar men

dariya men us ki tir-e-mizha ka pade jo aks

surakh ho har ik guhar-e-ab-dar men

aaya kabhi na yaar na aaya main aap men

apne aur us ke shikve kiye intizar men

nasur pad gai tire danton ke rashk se

rauzan nahin hain ye guhar-e-abdar men

kha kha ke gul mua huun jo main mere khaak ke

taus bante hain chaman-e-rozgar men

aate hi fasl-e-gul mujhe josh-e-junun hua

zanjir-e-dar se baagh ke bandho bahar men

karte hi saaf aine ko khaak dekh le

jauhar na puchh jo hain har ik khaksar men

rakhte nahin ghurur se vo paanv arsh par

chalte hain sar ke bal jo rah-e-ku-e-yar men

batlaun kya vo kaisi hai aram ki jagah

so jaaen paanv jaun agar ku-e-yar men

apne siva nahin hai koi apna ashna

dariya ki tarah aap hain apne kanar men

‘goya’ kabhi hai yaas kabhi intizar-e-yar

kya kya hain ranj zindagi-e-mustaar men

More Poems

Leave a Comment