Shahnaz Muzammil
jo the manzilon ke firaq men sabhi raste vo miTa diye
sar-e-sham hi jo bhaḌak uThe vo alaav main ne bujha diye
main fareb-e-vaqt men qaid thi ruḳh karvan na badal saki
kaḌi dhuup men jo mile shajar to vahin pe Dere jama diye
tha ajiib mera bhi naḳhuda use azmana tha hausla
mujhe zulmaton ke sipurd kar ke charagh saare baḌha diye
na mila mujhe koi naqsh-e-pa na visal ka hi sabab bana
mire reza reza se ḳhvab the shab-e-na-rasa men jala diye
liye haath men vo kaTe shajar rahe muntazir ki mile samar
nazar aa.e un ko na bal-o-par jo the ghonslon men daba diye
ye tira karam hai mire ḳhuda vo nazar hui hai mujhe ata
saf-e-dushmanan men chhupe hue ruḳh-e-dostan bhi dikha diye
kabhi sard sard si dhuup thi kabhi thi tapish jami barf men
na.e mausamon ke mizaj ne sabhi ruḳh faza ke dikha diye
mujhe vahimon ne Dasa kabhi kabhi chiḳhti rahin ḳhvahishen
main jo mubtla-e-fareb thi sar-e-dar sapne saja diye
Leave a Reply