Anwar Sadeed
us ki ana ke but ko baḌa kar ke dekhte
miTTi ke aadmi ko ḳhuda kar ke dekhte
mayusiyon men yuun hi tamanna ujaaḌ di
uTThe hue the haath dua kar ke dekhte
dushman ki chaap sun ke na ḳhamosh baiThte
jo farz tum pe tha vo ada kar ke dekhte
be-mehri-e-zamana ka shikva fuzul hai
nikle the ghar se gar to sada kar ke dekhte
us ke baghair zindagi kitni fuzul hai
tasvir us ki dil se juda kar ke dekhte
gardan jhuka ke chalne men kitna vaqar hai
apni ana se ḳhud ko riha kar ke dekhte
taaza hava men uḌne ki ḳhvahish thi gar ‘sadid’
tum apna jism vaqf-e-faza kar ke dekhte
Leave a Reply