Havi Momin Abadi
kin ḳhayalon men tu dilbar paḌa hai
ek se ek yahan par paḌa hai
main vo darvesh huun jis ka zamane
sat.h-e-aflak pe bistar paḌa hai
asman ki ye bulandi nahin kuchh
asman to mire sar par paḌa hai
ek nadan se sanam ki gali men
ek ustad hunar-var paḌa hai
‘mir’ kahte the jise sang-e-giran
mere dil par vahi patthar paḌa hai
dhuup men ḳhvar phirun main mira dil
zulf ke saa.e men ḳhush-tar paḌa hai
mere ashkon men mire sher hain tar
saara ḳhitta zamin ka tar paḌa hai
yuun hi ‘havi’ main ugalta nahin dur
mere qadmon men samundar paḌa hai
Leave a Reply