Himayat Ali Shayar
is shahr-e-ḳhuftgan men koi to azaan de
aisa na ho zamin ka javab asman de
paḌhna hai to navishta-e-bainassutur paḌh
tahrir-e-be-huruf ke ma.ani pe dhyan de
suraj to kya bujhega magar ai hava-e-mahr
tapti zamin pe abr ki chadar hi taan de
ab dhuup se gurez karoge to ek din
mumkin hai saaya bhi na koi sa.eban de
main sochta huun is liye shayad main zinda huun
mumkin hai ye guman haqiqat ka gyaan de
main sach to bolta huun magar ai ḳhuda-e-harf
tu jis men sochta hai mujhe vo zaban de
suraj ke gird ghuum raha huun zamin ke saath
is gardish-e-mudam se mujh ko amaan de
main tangi-e-makan se na ho ja.un tang-dil
apni tarah mujhe bhi koi la-makan de
meri gavahi dene lagi meri sha.eri
yarab mire suḳhan ko vo husn-e-bayan de
Leave a Reply