yahan har lafz maani se juda hai
haqiqat zindagi se mavara hai
abhi chehre ka khaka ban raha hai
abhi kuchh aur bhi mere siva hai
hamen jo kuchh mila naqis mila hai
magar khush-fahmiyon ki intiha hai
koi chehra nahin khushbu ka lekin
tamasha phuul valon ka laga hai
main us ki barishon ka muntazir huun
vo mujh se mere aansu mangta hai
yahi baais hai meri tishnagi ka
samundar mujh se paani mangta hai
jahalat rog tha jo dil ke andar
vahi maz.hab hamara ho gaya hai
muqaddas ho gaya hai jhuut mera
mujhe to ab usi ka aasra hai
main pyasa huun purane mausamon ka
magar ab vo zamana ja chuka hai
kahani barg-e-sozan se ibarat
vagarna bahr-o-bar bhi hashiya hai
nahin hai khvab si tasvir jis ki
to phir us khvab ki taabir kya hai
guman hangama-arai ka aadi
yaqin tanhaiyon men bolta hai
ye duniya be-khabar logon ki ‘ahmad’
vo duniya ka nahin jo janta hai
Leave a Reply