jo mujh se duur jaana chahta tha
vo mere saath hi pakḌa gaya tha
main apni muTThiyon men qaid tha ya
mujhe aisa kisi ne kar diya tha
miri ankhen to main ne noch liin thiin
mujhe phir bhi kisi ne paḌh liya tha
bichhaḌte vaqt bhi dil kuchh na bola
ye pagal zabt kar ke rah gaya tha
tha us se ishq ka iz.har karna
mujhe kuchh aur hi kahna paḌa tha
use mujh se riha.i chahiye thi
main apni laash par baiTha hua tha
kaha donon ne ik duuje ko behtar
bas us ke ba.ad jhagḌa ho gaya tha
jahan ke tabsire se tang aa kar
bahut nuqsan ham ne kar liya tha
sitare baḌh rahe the meri janib
magar vo chand kyuun Thahra hua tha
mire yaaro tumhari hi badaulat
safar jaari hua hai, ruk gaya tha
kabhi avaz di thi ‘muntazir’ ko
main apne aap se Takra gaya tha
Leave a Reply