Arshad Mahmood Arshad
uTha rahe ho jo yuun apne astan se mujhe
nikal kyuun nahin dete ho dastan se mujhe
ḳhabar nahin hai ki main kis ghaḌi chala ja.un
sada.en aane lagin ab to asman se mujhe
ye janta hi nahin huun kahan main bhuul aaya
vo ek raaz jo kahna tha raz-dan se mujhe
nikal sakta nahin huun main dil se hubb-e-husain
virasaton men mili jo ki apni maan se mujhe
main janta huun agar aaj tum ganva doge
talash karna hai kal tum ne phir yahan se mujhe
jo zaḳhm zaḳhm huun ta.anon ke tiir kha kha ke
to maar kyuun nahin dete ho ab ke jaan se mujhe
guzar gaya hai jo lamha vo phir nahin aaya
mila hai dars yahi umr-e-ra.egan se mujhe
pahunch to ja.unga main bhi yaqin ke sahil par
nikale koi to ‘arshad’ par is guman se mujhe
Leave a Reply