Jahan Ara Tabassum
dil mira luuT gaya vo baḌi tauqir ke saath
jo mujhe jiit na paaya kabhi shamshir ke saath
koi kis tarah se badlega muqaddar ka likha
koi kis tarah se laḌ pa.ega taqdir ke saath
dil ki nagri se ka.i ek musafir guzre
koi Thahra hi nahin hai dil-e-be-pir ke saath
dard jab had se guzar jaa.e to kuchh baat bane
naam mera bhi kabhi aa.e taqi-‘mir’ ke saath
main use bhuul ke bhi yaad nahin aa sakti
jo mujhe bandh gaya dard ki zanjir ke saath
main ne minnat se aur minnat se tumhen manga hai
tum jo mil sakte the mujh ko kisi tadbir ke saath
ye hi alfaz miri shaan hain sarmaya hain
kuchh taqabul nahin in ka kisi jagir ke saath
kaaT kar aaj ke aḳhbar ko ta.aviz kiya
teri tasvir chhapi hai tiri tahrir ke saath
tujh ko ranjha se kabhi bhi koi nisbat na rahi
har fasane men mira zikr chala hiir ke saath
aap pahlu se yuun chup-chap lage baiThe hain
jaise tasvir laga de koi tasvir ke saath
daad milti hai ‘tabassum’ tujhe yuun der ke baa’d
tere ash.ar samajh aate hain taḳhir ke saath
Leave a Reply