DhunDhna Milna bichhaDna Kahin Khona Ruk Jae

DhūñDhnā milnā bichhaḌnā kahīñ khonā ruk jaa.e

ye jo hotā hai tabī.at meñ ye honā ruk jaa.e

ġham kī bad-rūh se kuchh aur tavaqqo.a mat rakh

raat ke pichhle pahar us kā ye ronā ruk jaa.e

har mahīne kī tarah phir se baḌhe iḳhrājāt

phir kahīñ nanhe se bachche kā khilaunā ruk jaa.e

is liye duble hue jaate haiñ sab ahl-e-ishq

khānā-pīnā na rahe chain se sonā ruk jaa.e

dil kī barbādī bhī hai dast-darāzī misdāq

jo tire saath huā auroñ se honā ruk jaa.e

Leave a Comment