har ek gaam pe sajda yahan rava hoga
khudi ka daur hai har shakhs ab khuda hoga
ba-nam-e-fasl-e-baharan khizan ki puuja hai
yahi mazaq-e-gulistan raha to kya hoga
dhuan sa uthne laga dil se ahl-e-mahfil men
naya charagh koi bazm men jala hoga
tumhare shahr men aae hain ahl-e-ghurbat phir
is aas par ki koi dard-ashna hoga
jaras hai un ka sada un ki karvan un ke
sivae gard-e-safar mere paas kya hoga
kabhi na ahd-e-junun men kisi ne socha tha
khirad ka daur bahut sabr-azma hoga
‘nasim’ ham se hai zinda jahan men nam-e-vafa
hamare baad zamana badal chuka hoga
Leave a Reply