Rahat Hasan
sara-e-shar men rahna paḌ raha hai
qaza ke Dar men rahna paḌ raha hai
hai mere qatl ke darpai ḳhamoshi
sada ke dar men rahna paḌ raha hai
main ḳhud ko dusron men dekhta huun
so chashm-e-tar men rahna paḌ raha hai
ḳhayal-o-ḳhvab hain jis ke muavin
use bistar men rahna paḌ raha hai
main huun jis ka dil-o-jan se muḳhalif
usi lashkar men rahna paḌ raha hai
guzara faqr par hota hai phir bhi
panah-e-zar men rahna paḌ raha hai
chala hai hijraton ka daur jab se
zamane-bhar men rahna paḌ raha hai
koi to laash hai mere havale
jo murda ghar men rahna paḌ raha hai
hava ke paanv to bahar hain ‘rahat’
mujhe chadar men rahna paḌ raha hai
Leave a Reply