ḳhaksari thi ki bin dekhe hi ham ḳhaak hue
aur kabhi marka-e-fat.h-o-zafar dekh na paae
us ne dekha hai to phir dekhna kya ho jaae
dekhte rahna hai zalim ko idhar dekh na paae
be-hunar dekh na sakte the magar dekhne aae
dekh sakte the magar ahl-e-hunar dekh na paae
ho gae ḳhvahish-e-nazzara se be-ḳhud itne
dekhna chahte the us ko magar dekh na paae
kab use lauT ke dekhenge ye dekha jaae
ham ne duniya to bahut dekh li ghar dekh na paae
log jab dekhne par aae to itna dekha
aankh pathra gai aur had-e-nazar dekh na paae
vo bhi kya dekhna tha dekhne vaale bole
jalva har-chand raha pesh-e-nazar dekh na paae
diip jalte rahe taqon men ujala na hua
aankh paband-e-tahayyur thi udhar dekh na paae
ye tayaqqun nahin hota tha kidhar dekh sake
ye ta.ayyun nahin hota tha kidhar dekh na paae
vo taghaful tha ki us ne hamen dekha hi nahin
vo tasahul tha ki ham us ki nazar dekh na paae
is qadar tez chali ab ke hava-e-na-bud
chaah kar shahr-e-tamanna ka khandar dekh na paae
yuun hua dil-zadgan lauT gae aḳhir-e-shab
raat to jaag ke kaaTi thi sahar dekh na paae
kis ne dekhi hai ujalon se sulagti hui raat
aur jo dekh sake ḳhvab-e-sahar dekh na paae
Leave a Reply