Azhar Abbas
mujh ko itna to yaqin hai main huun
aur jab tak ye zamin hai main huun
is se aage main kahan tak sochun
aadmi jitna zahin hai main huun
ye jise saath liye phirta huun
ye koi aur nahin hai main huun
ek chhoTa sa mahal sapnon ka
jis men ik mah-jabin hai main huun
ghar ke bahar hai koi mujh jaisa
aur jo ghar men makin hai main huun
mere malbe pe khaḌe hain sab log
dekhta koi nahin hai main huun
Leave a Reply