Sagheer Malal
faqat zamin se rishte ko ustuvar kiya
phir us ke baad safar sab sitara-var kiya
bas itni der men adad ho ga.e tabdil
ki jitni der men ham ne unhen shumar kiya
kabhi kabhi lagi aisi zamin ki halat
ki jaise us ko zamane ne sangsar kiya
jahan-e-kohna azal se tha yuun to gard-alud
kuchh ham ne ḳhaak uḌa kar yahan ghubar kiya
bashar bigaḌega mahaul vo jo us ke liye
na jaane kitne zamanon ne sazgar kiya
tamam vahm o guman hai to ham bhi dhoka hain
isi ḳhayal se duniya ko main ne pyaar kiya
na saans le saka gahra.iyon men jab vo ‘malal’
to us ko apne jazire se ham-kanar kiya
Leave a Reply